Artist in residence - Hámmárfeasttas

Davvi Lávdedáidda fállá lávdedáiddáriidda resideanssa Hámmárfeasttas.

Geat sáhttet boahtit residensii:

Mii dohkkehat buot prošeavttaid mat gullet lávdedáidagii. Prošeakta sáhttá leat vaikke guđe dásis – jurddaovdánahttimis – čájálmasa buvttadeapmái. Ohcamis ferte čielgasit boahtit ovdan manne du prošektii lea dehálaš resideanssain Davvi Lávdedáidagis ja Hámmárfeasttas dáiddalaš ovdánahttima oktavuođas.

Sáhttá leat resideanssas gaskal 14 ja 20 beaivvi. Jus lea dakkár prošeakta mas lea dárbu guhkit residensii go 20 beaivvi de lea dat ge vejolaš. Dalle fertet dán dárkilit čilget ja vuđolaččat ákkastallat iežat ohcamis.

Fasilitehtat:

Min studio sáhttá geavahuvvot birra jándora go leat resideanssas. Studio lea 16 x 10 x 4m, ja das lea speajalseaidni ja glássaseaidni maid sáhttá sevdnjes láseliinniiguin gokčat. Das lea maid dipma láhtti (springgulv) ja dánsunmáhtát. Studios lea eaŋkalis jietna- ja čuovgarusttet maid resideansajoavku sáhttá geavahit. Fuomáš ahte mis Davvi Lávdedáidagis ii leat virgáduvvon teknihkalaš bargi.

Studio lea goalmmát gearddis, ja visttis lea heaisa. Olles visti lea heivejuvvon juvlastuollogeavaheddjiide, lea vejolaš beassat juohke geardái, maiddái studioi, min kantuvrii ja hivssegiidda/riššui. Buot váldouvssat rahpasit automáhtalaččat go deaddila boalu, muhto eará uvssat visttis eai leat automáhtalaččat. Leat muhtin uksalasát heaissain studioi. Lahka studio lea hivsset mii lea heivehuvvon doaimmashehttejuvvon olbmuide, das lea heaisa mainna sáhttá olbmo loktet, hivssetstuollu ja molssodanbeaŋka rávisolbmuide. Dán hivssegis lea maid molssodanbeavdi mánáide.

Min resideansaviessu lea lahka gávpotguovddáža, ádjána sullii 10 minuhta vázzit Arktisk Kultursenter:s gos studio lea gávpogii. Resideansaviesus leat njeallje oađđinlanja ja ođđaáigásaš viessodárbašat, ja nuvttá WIFI. Viesus sáhttá várdát hápmana ja gávpotguovddáža.

Resideansaviessu ii leat olámuttos juvlastuollogeavaheddjiide go das leat guokte gearddi ja boardagat sihke olgun ja siste. Molssaeaktun lea hotealla, gos sáhttá idjadit, mii lea Arktisk Kultursenter bálddas, ja doppe lea vejolaš orrut jus leat hástalusat lihkademiin dahje geavaha juvlastuolu.

Mii diehtit ahte sáhttet leat eará dárbbut beasatlašvuođa dáfus go dat maid mii leat namuhan dás. Mii ávžžuhat dáiddáriid váldit oktavuođa minguin jus leat dárbbut beasatlašvuođa hárrái ja jus leat jearaldagat.

Áigemearit

Mis leat ohcanáigemearit guktii jagis: Guovvamánu 10. b. - resideansa čavčča seamma jagi. Čakčamánu 10. b. - resideansa giđa maŋit jagi. Ohccit ožžot vástádusa 5-6 vahkku áigemeari maŋŋá.

Ohcanskovvi rahppojuvvo guokte mánu ovdal áigemeari.

Mo mii válljet

Leat muhtin eavttut maid vuođul mii válljet dáiddáriid residensii:

• Prošeavttas ferte leat dárbu residensii
• Profeššunealla oasálaččat ja ovttasbargoguoimmit
• Čađahannávccat

Mis lea mihttun addit resideanssa iešguđetlágan dáiddáriidda ja prošeavttaide. Lea dehálaš ahte boahtá ovdan ohcamis manne don ozat resideanssa min luhtte Hámmárfeasttas ja mainna háliidat bargat dáppe.

Mii ávžžuhat dáiddáriid geain lea duogáš mii dagaha áššiid hástaleaddjin ohcat resideanssa min luhtte. Duogáš mii dagaha áššiid hástaleaddjin sáhttá leat ahte gullá sosioekonomalaš jovkui mii ii ovddastuvvo almmolašvuođas nu dávjá, muhtin gii vásiha čearddalaš dahje etnalaš vealaheami, muhtin gii vásiha negatiivvalaš kultuvrralaš ovdagáttuid nationála dahje internationála dásis, olbmot geat gullet LGBTQ+ searvevuhtii, dahje muhtin geas lea doaimmashehttejupmi.

Jus válljejuvvot

Jus dutnje fállojuvvo resideansa, de gokčá Davvi Lávdedáidda hálbbes mátkkoštanvuogi Norggas eanemustá njealji olbmui. Mii addit maid prošeaktadoarjaga mii lea 1200 ru jándoris juohkehažžii gii lea mielde resideanssas. Jus leat golut eambbosiidda go njealljásiidda de ferte resideansajoavku gokčat daid liigegoluid ieš. Dáiddárat geat mátkkoštit olgoriikkas fertejit gokčat mátki Norgii ieža.

Mii háliidat ahte min resideansadáiddárat juhket dan barggu maid leat bargan resideanssas man nu láhkai. Sáhttá leat juogo ahte čájehit maid leat dahkan gehččiide, ahte láhčet digaštallama dahje muhtin earálágan almmolaš ovdanbuktima.

Ohcanskovvi rahppojuvvo sullii 2 mánu ovdal ohcanáigemeari